Méster Bëlnégò Czëtaniô
Tczëwôrtny szkólny kaszëbsczégò jãzëka, òbsãdzëcele na rozmajitëch etapach kònkùrsu Méster Bëlnégò Czëtaniô,
wiôldżé Bóg zapłac za Wajã drãgą robòtã òb czas ùszłëch edicjów. Jesmë wdzãczny za to, że jesta nalazła czas, żebë przërëchtowac dzecë i młodzëznã do snôżégò czëtaniô pò kaszëbskù i do te, żebë taksowac wëstãpë ùczãstników w gminach, pòwiatach i we wiôldżim finale we Wejrowie.
Dzãkùjemë téż za wszëtczé zgłoszoné pòdpòwiedzë. To dzãka nima më latos zmienilë czile pónktów Regùlaminu. Nôwôżniészą zmianą je wprowadzenié nowi kategórii. Ùczniowie spòdlecznëch szkòłów jidą na miónczi w 4 (a nié jak donëchczas w trzech) wiekòwëch kategóriach: kl. I-II, kl. III-IV, kl. V-VI i kl. VII-VIII.
Wiele pitaniów òd szkólnëch tikało sã kriteriów taksowaniô Méstra Bëlnégò Czëtaniô. Nôwôżniészim z nich je wërazné przekôzanié zamkłoscë (trescë). Prosymë tej òbsãdzëcelów, żebë dôwelë bôczenié przédno na pòprôwnotã wëmòwë, na radzenié so czëtającégò z interpónkcyjnyma (rozczidkòwima) merkama, na płinnotã czëtaniô.
Równoczasno nie jesmë nijak przék czëtaniémù w domôcëch gwarach – nordowëch, pôłniowëch i wszëtczich jinëch. Wôżné je równak, żebë ùczãstnicë ùżiwelë jich kònsekwentno.
Je wiedzec, że nie taksëjemë tegò, co je do bëlnégò czëtaniô niewôżné, jak òbleczënk abò òglowi wëzdrzatk.
Zanôlégô nama na tim, żebë jak nôwicy szkòłów brało ùdzél w najim kònkùrsu, ale ni mòże to miec cëskù na òceniwanié. Żelë, wezmë na to, w gminowëch eliminacjach nôlepi dało so radã z tekstã troje ùczniów z jedny szkòłë, to prawie òni mają so zasłëżoné na przeńdzenié do pòwiatowëch eliminacjów (nie zdrzimë na „geògraficzné kriterium”).
Żelë môta jiné pitania do òrganizatorów, prosymë ò kòntakt. Spróbùjemë na wszëtczé òdpòwiedzec jak nôrëchli.