Kaszëbsczé wëdarzenia we Gduńskù z rësznym ùdzélã MKPPiM
W kaszëbsczi stolëcë 19 lëstopadnika bëłë dwie wôżné rozegracje – Gduńsczé Tôrdżi Ksążczi i wrãczenié nôdgrodów miesãcznika „Pomerania” – Skrów Òrmùzdowëch. W òbëdwùch wëdarzeniach brelë ùdzél przedstôwcowie Mùzeùm Kaszëbskò-Pòmòrsczi Pismieniznë i Mùzyczi we Wejrowie.
Òbczas Tôrgów direktór Mùzeùm Tomôsz Fópka, a téż Róman Drzéżdżón i Dark Majkòwsczi bëlë rôczony na dwie lëteracczé òbgôdczi jakno prowadzący i znajôrze. W pierszi z nich kôrbilë ò dzysdniowi kaszëbsczi lëteraturze – ji nôwôżniészich znankach, témach i karnie piszącëch. Òkòma nich w òbgôdce brôł ùdzél lëteraturoznajôrz Grégór Schramke.
W drëdżi diskùsje Tomôsz Fópka i Dark Majkòwsczi bëlë ùczãstnikama zéńdzeniô pt. „Co wiemy o Kaszubach? – promocja serii Vademecum kaszubskie”. Wespół z Adelą Kùjik-Kalinowską, Danielã Kalinowsczim, Duszanã Pażdżersczim, Łukaszã Grzãdzëcczim i Grégòrã Schramke òpòwiôdelë pòzeszłim òbzérnikóm ò badérowaniach nad kaszëbską historią, lëteraturą, kùlturą i ò stojiznie kaszëbsczégò jãzëka.
Wôrt dodac, że òbczas tôrgów bëła mòżlëwòta pòznaniô wëdôwnégò bédënkù najégò Mùzeùm i kùpieniô niejednëch ksązków, jaczich jesmë wëdôwcą.
Drëgô kaszëbskô (a tak pò prôwdze kaszëbskò-pòmòrskô) rozegracjô we Gduńskù bëła tegò dnia w Stôromiesczi Radnicë. Redakcjô „Pòmeranie” wrãcziwała tam swòje rokroczné nôdgrodë. Westrzód latosëch Òrmùzdowëch Skrów nie felowało lëdzy, jaczé na rozmajiti ôrt wespółrobią z Mùzeùm, jak np. Adela Kùjik-Kalinowskô i Artur Jabłońsczi. Òkróm nich nôdgrodzony òstelë: Jaromira Labùdda, Alicjô Gajewskô, Hieronim Kùcharsczi i ks. Krësztof Tusk. Òbczas rozegracje bëło téż wrãczoné sztipendium m. Jizabellë Trojanowsczi. Dostôł je naji robòtnik Matéùsz Klebba. Winszëjemë jemù i wszëtczim nôdgrodzonym!
Òbczas ùroczëznë w Stôromiesczi Radnicë wëstąpił Tomôsz Fópka, chtëren wespół z Jakùbã Klemensewiczã zaprezentowôł czile kaszëbsczich nowëch swòjëch piesniów na saksofón i baritón.
dm/tf
Foto: Robert Groth, tf
