Costerina 2021. Mùzeùm w Wejrowie wëprzédnioné
Z redoscą dzelimë sã wiadłã ò wëprzédnieniach dlô najégò Mùzeùm a aùtorów z nama wespółrobiącëch, jaczé më dobëlë w latosym Kònkùrsu Kaszëbsczi i Pòmòrsczi Ksążczi w Kòscérznie.
W kategòrie Kaszëbskô Lëteratura. Nôùkòwé a pòpùlarnonôùkòwé òpracowania 3 plac dobéł Przemësłôw Ruchlewsczi za dokôz: „To Muzeum. 50 lat działalności Muzeum Piśmiennictwa i Muzyki Kaszubsko-Pomorskiej w Wejherowie”. Wëprzédnienié w ti kategòrie trafia do Daniela Kalinowsczégò za ksążkã „Emigracja kaszubska. Zjawiska, ludzie, ośrodki”.
W kategòrie Pòmòrskô lëteratura. Lëteratura dlô dzecy i młodzëznë wëprzédnienié dostôł Róman Drzéżdżón za òpracowanié ksążeczczi „Opowieści znad Bałtyku. Tales of the Baltic”, jakô je dzélã midzënôrodnégò projektu South Baltic Manors.
Wëprzédnienié dosta téż naju Mùzeùm jakno wëdôwca, chtërnégò trzë pùblikacje bëłë w latosym kònkùrsu nôdgrodzoné.
Dzãkùjemë òbsãdzecélóm za nôdgrodë, gratulejemë wszëtczim dobéwcóm, a òrganizatorowi kònkùrsu Bibliotece Miesczi w Kòscérznie żëczimë brzadnégò dzejaniô na „tôrgòwim” gónie w przińdnëch latach.
Nôdgrodzoné ksążczi, a téż wiele jinëch dokôzów, mòże kùpic w najim krómikù w Ksążnicë miona prof. Gerata Labùdë we Wejrowie.
rd
